Qarabağ Rəqəmsal Geoinformasiya Sisteminin (QRGS) əsas məqsədi dövlət qurumlarının məlumatlarının inteqrasiyası əsasında işğaldan azad olunmuş ərazilərdə  informasiyaların vahid rəqəmsal məkanda toplanılması, emalı və səmərəli istifadəsinin təmin edilməsidir.

2021-ci ildə yaradılmış Qarabağ Rəqəmsal Geoinformasiya Sisteminə daxildir:

• azad edilmiş ərazilərdə ilkin inventarlaşdırma əsasında təsbit edilmiş daşınmaz əmlak və infrastruktur obyektləri barədə məlumatlar;

• işğala qədər mövcud olmuş dövlət və ictimai binalar, yaşayış məntəqələri, müəssisə və təşkilatlar, infrastruktur obyektləri, meşə fondu və faydalı qazıntı obyektləri barədə mətn və qrafik formada arxiv materialları;

• işğaldan əvvəlki dövr və indiki dövr arasında olan fərqlər, dəymiş ziyanın təsbit edilməsinə dair məlumatlar;

• minatəmizləmə, təhlükəsizlik, idarəetmə, ərazilərdən istifadənin planlaşdırılması və şəhərsalma, məskunlaşma, təbii resurslardan istifadə barədə məlumatlar;

• işğaldan azad olunmuş ərazilərdə planlaşdırılan, layihələndirilən və həyata keçirilən infrastruktur obyektləri barədə məlumatlar;

• iqtisadiyyatın bərpası və dayanıqlı inkişafı sahələrində görülən tədbirlər barədə məlumatlar.