İpoteka krediti əldə edən zaman ən çox girov qoyulan əmlaklar

Ölkəmizdə ipoteka krediti əldə edən zaman daha çox daşınmaz əmlak girov olaraq rəsmiləşdirilir. Belə ki, vətəndaşlar yaşayış evi və ya mənzil almaq üçün ipoteka kreditinə müraciət edirlər. Daşınmaz əmlakların daha çox alqı-satqı prosesində iştirak etməsi və girov predmeti olması isə bu bazarın canlanmasına səbəb olur. Bu sahə üzrə 2022-ci ilin yanvar-sentyabr aylarının statistikasına nəzər yetirək.

Cari ilin yanvar-sentyabr ayları ərzində bağlanan ipoteka müqavilələrinin sayı

İqtisadiyyat Nazirliyi yanında Əmlak Məsələləri Dövlət Xidmətinin məlumatına görə, 2022-ci ilin yanvar-sentyabr ayları ərzində ölkəmizdə 51.347 daşınmaz əmlak üzrə ipoteka müqaviləsi qeydə alınıb. Bu, ötən ilin eyni dövrü ilə müqayisədə 14.549 və ya 39,5% çox olub.   

2022-ci ilin ilk 9 ayı ərzində ən çox girov qoyulan daşınmaz əmlaklar

2022-ci ilin ilk 9 ayı ərzində Azərbaycanda girov qoyulan əmlaklar sırasında mənzillər, torpaq sahələri və fərdi yaşayış evləri ilk 3-lükdədir. Ən çox girov qoyulan daşınmaz əmlak isə mənzillərdir. Belə ki, 2022-ci ilin yanvar-sentyabr ayları ərzində 29.375 mənzil üzrə ipoteka müqaviləsi bağlanılıb. Cari ilin 9 ayı ərzində girov qoyulmuş ümumi 51.347 əmlakdan 8.946-sı torpaq sahəsinin, 7.931-i isə fərdi yaşayış evinin payına düşüb.

 

2022-ci ilin yanvar-sentyabr ayları ərzində

daşınmaz əmlak növləri üzrə ipoteka müqavilələri

 

Əmlak növləri	Müqavilə sayı	Ümumi göstəricidə payı (faizlə)
Mənzil	29375	57.2%
Torpaq sahəsi	8946	17.4%
Fərdi yaşayış evləri	7931	15.4%
Qeyri-yaşayış sahələri	1810	3.5%
Qeyri-yaşayış binaları	1709	3.3%
Bağ evləri	992	1.9%
Digərləri	584	1.1%
Ümumi say	51347	100.0%

 

Daşınmaz əmlak üzrə ən çox ipoteka müqaviləsi paytaxt Bakıda bağlanıb. Cari ilin yanvar-sentyabr ayları ərzində paytaxtda ümumilikdə 28.243  ipoteka müqaviləsi bağlanılıb ki, bu da ölkə üzrə ümumi göstəricinin 55%-ni təşkil edir. Bakıdan sonra ən çox ipotekanın dövlət qeydiyyatı Əmlak Məsələləri Dövlət Xidmətinin “Daşınmaz Əmlakın Dövlət Kadastrı və Reyestri” publik hüquqi şəxsin 4 saylı Abşeron (5781 müqavilə), 2 saylı Sumqayıt (3439 müqavilə), 3 saylı Gəncə (2394 müqavilə) və 5 saylı Xaçmaz ərazi idarələrində (2291 müqavilə) aparılıb. Həmçinin, 17 saylı Yevlax və 13 saylı Şirvan ərazi idarələri də ən çox girov qoyulan bölgələr sırasındadır. Bu nəticələri həm də bölgədəki iqtisadi aktivliyin göstəricilərindən biri kimi qəbul etmək olar.

 

Sıra №	Ərazi İdarələrinin adı	İpoteka müqaviləsinin ümumi sayı	Ölkə üzrə göstəricidə payı (faizlə)
1.	1 saylı Bakı Ərazi İdarəsi	28243	55.0%
2.	4 saylı Abşeron Ərazi İdarəsi	5781	11.3%
3.	2 saylı Sumqayıt Ərazi İdarəsi	3439	6.7%
4.	3 saylı Gəncə Ərazi İdarəsi	2394	4.7%
5.	5 saylı Xaçmaz Ərazi İdarəsi	2291	4.5%
6.	17 saylı Yevlax Ərazi İdarəsi	1105	2.2%
7.	13 saylı Şirvan Ərazi İdarəsi	955	1.9%
8.	7 saylı Bərdə Ərazi İdarəsi	881	1.7%
9.	6 saylı Beyləqan Ərazi İdarəsi	810	1.6%
10.	10 saylı Lənkəran Ərazi İdarəsi	751	1.5%
11.	11 saylı Şəmkir Ərazi İdarəsi	718	1.4%
12.	12 saylı Şəki Ərazi İdarəsi	637	1.2%
13.	9 saylı Qəbələ Ərazi İdarəsi	631	1.2%
14.	16 saylı Ucar Ərazi İdarəsi	628	1.2%
15.	8 saylı Cəlilabad Ərazi İdarəsi	620	1.2%
16.	15 saylı Tovuz Ərazi İdarəsi	602	1.2%
17.	14 saylı Şamaxı Ərazi İdarəsi	438	0.9%
18.	18 saylı Zaqatala Ərazi İdarəsi	423	0.8%
Ölkə üzrə		51347	100%

 

 

Ayrı-ayrı əmlak növləri üzrə girovların ölkənin regionlar üzrə bölgüsünə nəzər saldıqda isə daha maraqlı nəticələr ortaya çıxır. Belə ki, cari ilin yanvar-sentyabr ayları ərzində ölkədə mənzillərin ən çox girov qoyulduğu ərazilər Bakı, Abşeron və Sumqayıtdır. Bütün girov qoyulan mənzillərin 92,6%-i bu üç ərazi idarəsinin payına düşür. Ölkənin regionlarında isə mənzillərin ən çox girov qoyulduğu bölgələr 3 saylı Gəncə, 17 saylı Yevlax, 13 saylı Şirvan ərazi idarələrinin xidmət dairəsində yerləşən şəhər və rayonlar üzrə müəyyən olunub. Mənzillərin ən az girov qoyulduğu bölgələr isə 14 saylı Şamaxı (14 müqavilə), 9 saylı Qəbələ (14 müqavilə) və 11 saylı Şəmkir (23 müqavilə) ərazi idarələridir.

Mənzillərin ən çox girov qoyulduğu bölgələr

 

Sıra №	Ərazi İdarələri	İpoteka müqaviləsinin sayı	Ölkə üzrə göstəricidə payı (faizlə)
1.	1 saylı Bakı Ərazi İdarəsi	21601	73.5%
2.	4 saylı Abşeron Ərazi İdarəsi	3298	11.2%
3.	2 saylı Sumqayıt Ərazi İdarəsi	2297	7.8%
4.	3 saylı Gəncə Ərazi İdarəsi	898	3.1%
5.	17 saylı Yevlax Ərazi İdarəsi	423	1.4%
6.	13 saylı Şirvan Ərazi İdarəsi	221	0.8%
Ölkə üzrə		29375	100%

 

2022-ci ilin 9 ayı ərzində girov qoyulan fərdi yaşayış evlərinin sayına görə paytaxt ilk yeri tutur. Ancaq bölgələrdə də bu kateqoriya üzrə aktivlik müşahidə olunur. Ölkənin bölgələrində fərdi yaşayış evlərinin ən çox girov qoyulduğu rayonlar 3 saylı Gəncə, 5 saylı Xaçmaz, 7 saylı Bərdə və  10 saylı Lənkəran ərazi idarələrinin dislokasiyalarında yerləşir.

 

Fərdi yaşayış evlərinin ən çox girov qoyulduğu bölgələr

Sıra №	Ərazi İdarələri	İpoteka müqaviləsinin sayı	Ölkə üzrə göstəricidə payı (faizlə)
1.	1 saylı Bakı Ərazi İdarəsi	2220	28.0%
2.	4 saylı Abşeron Ərazi İdarəsi	1114	14.0%
3.	3 saylı Gəncə Ərazi İdarəsi	738	9.3%
4.	5 saylı Xaçmaz Ərazi İdarəsi	542	6.8%
5.	7 saylı Bərdə Ərazi İdarəsi	432	5.4%
6.	10 saylı Lənkəran Ərazi İdarəsi	334	4.2%
Ölkə üzrə		7931	100%

Cari ilin 9 ayı ərzində ən çox torpaq sahəsinin girov qoyulduğu ərazilər sırasında ilk üçlüyü müvafiq olaraq 5 saylı Xaçmaz, 1 saylı Bakı və 4 saylı Abşeron ərazi idarələri tamamlayır. Torpaqların ən az girov qoyulduğu bölgələr isə 8 saylı Cəlilabad (156 müqavilə) və 15 saylı Tovuz (170 müqavilə) ərazi idarələridir.

Torpaq sahələrinin ən çox girov qoyulduğu bölgələr

Sıra №	Ərazi İdarələri	İpoteka müqaviləsinin sayı	Ölkə üzrə göstəricidə payı (faizlə)
1.	5 saylı Xaçmaz Ərazi İdarəsi	1529	17.1%
2.	1 saylı Bakı Ərazi İdarəsi	1440	16.1%
3.	4 saylı Abşeron Ərazi İdarəsi	1070	12.0%
4.	3 saylı Gəncə Ərazi İdarəsi	524	5.9%
5.	2 saylı Sumqayıt Ərazi İdarəsi	471	5.3%
6.	11 saylı Şəmkir Ərazi İdarəsi	446	5.0%
Ölkə üzrə		8946	100%