Ölkə başçısının tapşırıqlarına uyğun olaraq Əmlak Məsələləri Dövlət Komitəsinin sədr müavini Rüstəm Şahbazov 29 avqust tarixində İsmayıllı rayonunda vətəndaş qəbulu keçirib. Komitənin struktur bölmələri üzrə nümayəndələrin də iştirakı ilə keçən qəbulda vətəndaşlar tərəfindən torpaqların kadastrı, daşınmaz əmlakın dövlət qeydiyyatına alınması, dövlət əmlakının özəlləşdirilməsi, ünvan məsələləri ilə bağlı müraciətlər səsləndirilib. O cümlədən, hərraclarda iştirak, dövlət əmlakının icarəyə verilməsi, texniki parametrlərin müəyyən edilməsi və komitənin digər fəaliyyət istiqamətləri ilə bağlı məsələlərə də baxılıb.

Vətəndaşların səsləndirdiyi hər bir müraciət diqqətlə dinlənilib, qaldırılan məsələlərin əksəriyyəti elə yerində həll edilib. Araşdırma tələb edən müraciətlərlə bağlı sədr müavini struktur bölmələrin nümayəndələrinə müəyyən tapşırıqlar verib. Əmlak Məsələləri Dövlət Komitəsinin fəaliyyət istiqamətlərinə aid olmayan məsələlər vətəndaşlara izah olunub, müvafiq qurumlara yönləndirilməsi üçün qeydiyyata alınıb.

Qəbul çərçivəsində iştirakçılara komitənin fəaliyyəti ilə bağlı tətbiq edilən yeniliklər barədə məlumat verilib. Vətəndaşların göstərilən xidmətlərlə bağlı təklifləri dinlənilib.

Vətəndaş müraciətlərinin operativ həlli ilə bağlı bölgələrdə qəbullar davam etdiriləcək.